Neysluvísitölutrygging húsnæðislána er stórskaðleg rökvilla

Húsnæðislán, með veði í húsnæði, frá lánastofnun sem notar endurgreiðslu lánsins til að endurlána í ný húsnæðislán eru verðtryggð. En ekki með tilliti til húsnæðisverðs, heldur neysluvísitölu.

Þannig er endurgreiðsla lánsins tryggð með tilliti til m.a. verðs á áfengi eða matvöru. Einnig með tilliti til breytinga á virðisaukaskatti. En ekki með tilliti til þess hvort sama upphæð geti keypt sams konar hús seinna meir.

Þannig getur þensla á húnæðismarkaði valdið verðhækkunum sem eru vanmetnar í verðtryggingu sem aftur veldur því að ekki er slegið á þensluna þegar þess þarf og þensla í neysluverði getur valdið því að heildarlán hækka langt umfram heildar fasteignarverð.

 Auðvitað ætti að verðtryggja húsnæðislán miðað við verð á húsnæði og ekkert annað!

Ef svo hefði verið þá hefði það stórlega slegið á eignabóluna. Ef svo væri núna þá myndi það stórlega hjálpa heimilum og fyrirtækjum og vernda störf. Að svo skuli ekki vera er eignatilfærsla frá skuldurum til lánveitenda.

Greiðsluaðlögun komin í gegnum þingið

Athugasemdir

[Jóhann Gunnarsson, 30.3.2009 kl. 21:39]

Sæll og blessaður, Þorsteinn. 

Ég las með athygli grein þína í Morgunblaðinu (ef ég man rétt) fyrr í vetur um innbyggðar skekkjur í vísitölunni. Það vakti furðu mína að enginn skyldi bregðast við, en að því leyti sem ég hef getað fylgst með hefur það ekki gerst. En í gær kom Haraldur L Haraldsson hagfræðingur fram í Silfri Egils og hélt fram svipuðum skoðunum.

Er hugsanlega hægt að koma hugmyndum hans um leiðréttingu inn í umræðuna í stað þessara vondu tillagna um endurgreiðslu hvort sem talað er um tuttugu prósent eða flatar fjórar milljónir á skuldara?

Með bestu kveðju,

Jóhann Gunnarsson 

[Þorsteinn Helgi Steinarsson, 30.3.2009 kl. 22:37]

Sæll Jóhann

 Ég er ennþá að vinna að því að vekja athygli á vísitölumálinu og á eftir að skrifa meira um það hér á næstu dögum. Ég held það hljóti að fara að vekja athygli að forsendurnar fyrir hækkun vísitölunnar eru ekki eins óvefengjanlegar og af er látið.

 Kv. Þorsteinn