Gangverk svindlsins

Markaðsmisnotkun falskaupmanna gengur út á að ráðskast með mat á eignum (gangvirðið sbr. lög 3/2006 um ársreikninga). Þetta er hreint svindl (ólöglegt) framkvæmt á máta sem lítur út fyrir að vera löglegur þar sem miðað er við svokallað markaðsverð og endurskoðendur og bankar kvitta upp á.  

Viðskipti með hlutabréf (eða fasteignir eða kvóta) eiga sér stað á einhverju gengi sem tekið er sem markaðsvirði sem er lagt til grundvallar sem gangvirði í efnahagsreikningi (ef aðilar eru skyldir þá verður að meta gangvirðið með öðrum aðferðum).

Svindlkerfið er svona:

1. Leynt eignarhald falskaupmanns til að blekkja utanaðkomandi (og veita endurskoðendum skálkaskjól) sem eru látnir halda að um óskylda aðila sé að ræða
2. Ofmat á eignum byggt á meintu markaðsvirði (sem er tilkomið vegna eigin viðskipta eigenda) sem svo er tekið sem gangvirði á eignum á efnahagsreikningi
3. Endurskoðendur samþykkja (eða ákveða) matið (þ.e.a.s. nota markaðsverð sem viðmið fyrir gangvirði) þótt það sé ekki rétt þar sem um skylda aðila var að ræða
4. Bankar taka matið gilt sem gangvirði og veita lán gegn veði í viðkomandi eign
5. Bankar bera tapið sem er falið í bókhaldi eða fara á hausinn þegar upp kemst að eignirnar voru ofmetnar. Lítið fæst upp í kröfur enda efnahagsreikningur og hagnaður ýktur og innistæðulaus.

Þetta hefur ekkert með galla markaðshagkerfis að gera. Þetta hefur allt með markaðsmisnotkun að gera. Eftirlitsaðilar (endurskoðendur, bankar og FME brugðust) og löggjöfin (sem er alþjóðleg) er of slöpp. Verja þarf markaðshagkerfið betur fyrir svona svindli.

Athugasemdir

[Bjarni Harðarson, 28.1.2009 kl. 11:47]

nákvæmlega rétt greining þorsteinn- skrifaði aðeins um þessa aðferðafræði fyrir hálfu ári en þá þótti svona tal óþarfa bölsýni, - http://bjarnihardar.blog.is/blog/bjarnihardar/entry/601142/ kær kv. -b.

[Arni V (IP-tala skráð) 28.1.2009 kl. 11:58]

Fín umræða. 

Las greinina hjá Bjarna. Þetta hafa verið orð í tíma töluð um mitt sumar (og enn viðeigandi að sjálfsögðu). Kominn tími til að menn átti sig hvað eigendur fyrirtækja hafa gert íslensku efnahagslífi. Fyrirtæki sem komust í hendur þessara manna hafa verið skafin að innan af verðmætum og standa eftir sem skelin af sjálfum sér og ekki í stakk búin til að mæta mótlæti. Þegar mótlætið skellur á þá er því kennt um en ekki þeim sem töppuðu verðmætunum af þeim og settu skuldir í staðinn.

Peningarnir notaðir í útþenslu elrendis - og eins mikla neyslu og menn gátu í sig látið - en eru brunnir upp sama hvort er.

[Héðinn Björnsson, 28.1.2009 kl. 17:49]

Er einhver af ykkur sem hafið sett ykkur inn í þetta sem getið komið með tilbúin lagafrumvörp sem hægt er að fara að vinna brautargengi á Alþingi? Ég treysti mér ekki til þess sjálfur vegna vankunnáttu en ég treysti mér til að  lobbya fyrir slíku.